Moratuen erakustaldia Belabietan: Lauburuk hamar eta bi irabazi dio Entrerríos Automatización taldeari
Bigarren B Mailako seigarren jardunaldian, CMO Valves Lauburuk erakustaldi borobila eskaini zuen Belabietako harmailen aurrean. Etxekoek Entrerríos Automatización zapuztu zuten 10 eta 2ko markagailu argitsu batekin, eta hori guztia Caruso, Pol eta Unax Iglesiasen bajekin aritu arren.
Hasieratik argi geratu zen Diestrok zer nahi zuen: erritmoa jarri, aurretik jarri eta partidaren kontrola eskuratu, oldarkortasun eta zehaztasun handiz. Eta ez zuten denbora galdu —minutu bat igaro orduko, Rafa Usínek lehen gola sartu zuen maisutasunez. Berehala, Morandok eta Víctorrek festarekin bat egin zuten, bi minutu eskasetan beste bi gol sartuz.
Erasoko protagonista nagusiak Enaitz eta Morando izan ziren. Lehenak lau gol sartu zituen harmailetako zaleak zutitu araziz, eta bigarrenak hat-trick ikusgarria sinatu zuen, indarra eta zehaztasuna uztartuz. Bien arteko konexioak erabat gainditu zuen aragoiarren defentsa.
Markagailuak nagusitasun osoa erakusten bazuen ere, une garrantzitsuetan Txubi atezainak bi geldiketa ikusgarri egin zituen, aurkariek partida estutzeko aukera izan ez zezaten. Bitartean, Lauburuk golak pilatzen jarraitu zuen hamarrera iritsi arte; aragoiarrek bi gol sartzea lortu zuten eta Markosek azken geldiketa on batekin itxi zuen markagailua.
Hiru puntu garrantzitsu lortzeaz gain, Lauburuk erakutsi du goiko postuetarako hautagai serioa dela. Garaipen kolektiboa izan zen, talde lan bikain eta konfiantzaz betetakoa, talde piparreroa sasoi betean dagoela argi utziz.
Goleatzaileak: Rafa Usín, Chucky, Víctor, Morando (3), Enaitz (4).
