Areto futbol eskola

LAUBURU ESKOLAK 2023-2024 DENBORALDIRAKO IZEN-EMATEA IREKI DU

Klubeko Areto Futbol Eskolaren proiektuak abiadura hartu du jadanik eta denboraldi berriari begira lanean ari gara. Ilusio berriekin eta azken urte hauetan finkaturiko proiektutik jasotako esperientziatik abiatuta helduko zaio ikasturte berri honi.

Sortuko diren talde berriak jaiotza-urteen arabera banatuko dira, kategoria bakoitzean 2 talde egingo direlarik. Benjaminek astelehenetan entrenatuko dute eta, Alebinek, berriz, ostiraletan. Landu beharreko edukiak zein metodologia hobeto bideratzea izango dira helburuak, Eskolako haur bakoitzaren garapen onena lortzen saiatuz.

Saioetan, areto futboleko kontzeptu tekniko eta taktikoez gain, psikomotrizitatea, malgutasuna, koordinazioa eta prebentzioa bezalako gaiak landuko dira. Beren adinean eta etapan, haurrek ahalik eta denbora gehien gozatzeko aukera izan behar dute, baloiarekin ahalik eta baldintzarik onenetan jolastuz.

Klubak berme handiko tituludun teknikoak jarriko ditu taldearen formazioa burutzeko, talde teknikoak osatzeko monitoreez gain. Lauburuko lehen taldeko jokalarien laguntza ere izango dute. Erreferentziazko ereduak izango dira guztiak, umeentzat hain garrantzitsuak diren exekuzio teknikoari buruzko xehetasunak emateko.

Hortaz, zabalik dago jada izen-ematea eskualde osoan. Izena emateko, aurretik adierazi bezala, bete itzazue kategoria eta adin bakoitzeko inprimakien estekak. Klubak 20 plaza gaitu ditu kategoria eta adin bakoitzeko; Gipuzkoako Foru Aldundiak, Kirol Sailaren bidez, Areto-Futboleko modalitatean eskoletarako araututa dituen baldintzak betez.

Eskola zikloa 8 hilabetekoa izango da, urriko lehen astean hasi eta maiatzeko azken astean amaituko delarik. Denboraldian zehar topaketa ezberdinak antolatuko dira beste klubetako areto futbol eskolekin, Diputazioak horretarako baliatzen dituen egunetan. Izen-emateak urteko 300 euroko kuota izango du, kopuru horretatik 100€ berreskuratu ahal izango direlarik. Bi zatitan (urria eta urtarrila) edo epe bakar batean ordaintzeko aukera egongo da. Bertan sartuta egongo dira: beharrezkoa den erantzukizun zibilaren aseguru poliza, entrenamendurako arropa eta aktibitatea aurrera eramateko beharko den kirol material guztia.

Aurreko urteetan parte hartu duten gaztetxoak esperientzia ikaragarri hau errepikatzeko irrikitan daude 😍 eta Kluba zure zain dago jada!! GOAZEN LAUBURU!!!!💜

20 plaza maila eta adin bakoitzeko. Izen emate epea: plazak agortu arte