Urteko azken ahalegina CMO Valves Lauburu Ibarrarentzat
Asteburu honetan, partida berezia izango du CMO Valves Lauburu KE Ibarrak: urteko azken neurketa eta lehen itzuliaren itxiera izango da, Segovian jokatuko dena, larunbatean 18:00etan, San Cristóbalgo Udal Kiroldegian, Naturpellet CD San Cristóbal taldearen aurka.
Ibartarrek lehen itzuli ikaragarri hau biribiltzeko aukera izango dute hiru puntuak lortzen badituzte, eta hori, denboraldia hasi zenean, zaila zirudien ametsa baino ez zen. Mikel Diestrok zuzentzen duen taldea sasoi betean helduko da hitzordura, joko sendoagoa erakutsiz partida bakoitzean, bai defentsan, bai erasoko dinamikan.
Dena den, CMO Valves Lauburu Ibarrak ezingo du taldea osorik izan. Chuky, Kolonbiako selekzioarekin deitua izan denez, baja izango da; baita Pol Barrot ere, lesio batetik errekuperatzen jarraitzen duelako. Hala ere, taldeak ez du ilusioa galdu, eta garaipenarekin amaitu nahi du urtea, zaleei eskainitako opari modura Belabietako partida guztietan taldearen bultzatzaile handienak izanik, merezimendu osoz.
Helburua argia da: irabazi, ondo jokatu eta lesioak saihestu, Gabonetako oporrak familiaren artean lasai gozatzeko aurretik opari borobilena lortzeko. Partida zuzenean jarraitu ahal izango da klubaren YouTubeko kanal ofizialaren bidez.
Filialak ere zapore onarekin itxi nahi du urtea
Txubel eta Garmenek gidatutako filialak ere urteko azken partida jokatuko du larunbatean, 17:00etan, Belabietan, Aguraingo Oriamendi izango du aurkari.
Piparreroek baja garrantzitsuak izango dituzte berriz ere: Urko, Andu, Aitor eta Beñat ez dira deialdian egongo. Hala ere, bederatzi jokalarirekin bakarrik aritu behar izatea ez da aitzakia izango, eta etxean hiru puntuak lortzeko borrokan arituko dira buru-belarri. Helburua: bigarren garaipen jarraian eskuratzea eta jaitsiera postuekiko aldea handitzea.
Aste zailak izan dira haientzat, lan gogorra, lesioak eta jokalari gutxi izatea nagusi. Horregatik, urtea irrifartsu ixtea izango litzateke egindako esfortzuaren ordainik politena.
