Larunbatean maila honetako aurkaririk gogorrenetako baten aurka jokatu genuen, haize kontra borrokan aritu beharko genuela aski ondo jakinda.
Dani, Beñat, Ceci, Zaldua eta Txikirekin hasi genuen norgehiagoka eta 40. segundoa iritsita, Beñik markagailua estreinatu zuen jaurtiketa indartsu batekin baloia atezainari eskuetatik ihes egitea eragin ostean. Lehen gol horren ondoren, bigarrenak 2 minutu gehiago baino ez zituen behar izan heltzeko, Raulek egindako aldaratze batean.
0-2koarekin, handia zen motibazioa, eta, horren ondorioz, 7. minutuan Txikik aldea handitu zuen bigarren zutoinetik. Hori gutxi balitz bezala, segundo batzuk geroago, Danik bere punteria atera zuen argitara 0-4koa jartzeko, aurkariari aukeratutako 5eko jokoa antolatzeko ia denborarik eman gabe. Aurrerago, atsedenaldirako 2 minuturen faltan, etxekoak lehenengo gola egin zuten gure galera bati etekina ateratzen, eta emaitza horrekin joan ginen atsedenaldira. Bizkaitarrek behin bakarrik asmatu zuten arren, Danik ekintza askotan salbatu behar izan gintuen.
Aldageletatik itzuli ondoren, Dani, Ivan, Ceci, Txiki eta Raulekin ekin genion bigarren zatiari. Otxartabek atezain jokalariari eustea erabaki zuen, eta horri erantzunez, Zalduak gola sartu zuen beste behin ere ate hutsera jaurtita. Minutu bat gehiago behar izan zuen Raulek gauza bera egin, eta 1-6koa igotzeko. Ondo geunden, oso ondo, eta nabaria zen sentsazio hura.
Bigarren zati honen erdialdearen atarian, aurkariak beste bi gol sartu zituen 5eko jokoa alde batera utzi gabe, lehenengoa taldeko ekintza azkar batean, eta bigarrena, arrisku eremuaren barruan galdutako baloi bat aprobetxatuta. Gehiagorako gogoz, amaierarako 8 minuturen faltan, Bilbokoek berriro asmatu zuten area barrutik, eta nabarmentzen hasi ziren. Emaitzean eragindako hurbiltze horrek tentsio-minutuak ekarri zituen arren, beren jokoari eusten jakin izan genuen azken txistua entzun arte.
Izugarrizko indarra eman diguten 3 puntu eskuratu ditugu, eta era berean, harridura sortu dugu taulako bigarren postuko jabea izaten jarraitzen duen talde baten aurka garaipena lortuta. Hau da jarraitu beharreko bidea. GOOOOOOOOOOAZEN!!!!!
