Gaur Errioxako Albelda igo berriaren bisita jaso dugu Belabietan. Klubak abian jarritako ekimenari esker (bazkide bakoitzak pertsona bat gonbidatu zezakeen partidara), Belabietako harmailak bete egin dira norgehiagoka hasterako. Poz handia bai jokalarientzat, bai Lauburu osoarentzat.
Horrela, dena emateko asmoz, gure entrenatzaileak Marcos, Eric, Boli, Uri eta Chuky aukeratu zituen hasierako bostekoa izateko. Jokoaren lehen 5 minutuak igarota, ez talde batek ez besteak ez zuen abagune argirik sortu. Biek altu presionatzen zuten defentsan, baina hori ere ez zen nahikoa markagailua estreinatzeko.
Minutuek aurrera egin ahala, gero eta gehiago hurbildu ginen kontrako aldera. Aukera polita izan zuen Ikerrek, baloia kontrolatuta, eta, ondoren, porteriara zuzenean jaurtita. Hala ere, atezain aurkariak ondo erantzun, eta urrundu egin zuen baloia. Eta, azkenean, 10. minutuan, Txikik, toki perfektura une perfektuan iritsita, arratsaldeko lehena sartzen zuen ezker hegaletik, Uriren zerbitzura. Horren ostean, arrisku handiagoa sortu zuen aurkariak, eta Marcosek funtsezko bat baino gehiago salbatu zuen arrakasta handiarekin. Dena den, aldaketa nabarmenik gabe, 1-0ekoarekin iritsi gara atsedenaldira.
Aldageletatik bueltan, Dani, Txiki, Uri, Oscar eta Chuky bostekoarekin hasi ginen, eta, 3. minutuan, Txikik berriro sartu zuen baloia barrura (2-0). Belabieta osoa ospatzen! Hau poza! Gero, gure taldea bikain koordinatzen zen jokaldi politak sortzeko. Halaber, errioxarrek arriskatzearen aldu egin zuten apustu: lehenengo, atezaina jokalarien artean infiltratuta, eta, 5 minutu baino gutxiagoren faltan, 5eko jokoa erabilita.
Horrela, dena eman zuten amaierara arte, eta Danik gol bihurtzea eragotzi zituen pare bat jaurtiketa indartsu egin zituzten. Horren aurrean, eusten jakin genuen. Are gehiago, amaierarako 1: 42ra, Chuky eta Txikiren arteko kontraeraso oso azkar bati esker, azken honek partida erabakita utzi zuen 3 eta 0eko emaitzarekin.
Sailkapenari gehitzen dizkiogun beste hiru puntu garrantzitsu lortu ditugu. Noski, garaipena gure zaleekin partekatzea baino gauza hoberik ez dago. ESKERRIK ASKOOOOOOO!!!!
